jueves, 7 de noviembre de 2013

El casu ye movese

Aquella nueche tinía traces de ser una más de les que pasaben ensin pena nin gloria. Esto yera, por embargu, muncho albidrar, pela fama de la xente trisquelera y del so llabor en entamala a la mínima. Yeren los años de La Naval, la dómina de les batalles nel Natahoyo y les movides por too Xixón. Otra vegada dio-yos por encerrase nel astilleru, enfotaos en engarrase col mundu pola defensa del trabayu. D'aquella encerrábase mas xente, nun solo los currantes, llamaos pola solidaridá, que entovía quedaba. Tábamos el mi collaciu Julio y yo, finando a un probe barril de cerveza, que llevaba tiempu amoriando y toconos da-y les caberes xarraes. Pente'l fumu los fortunas, les cares amosaben ganes de que daqué pasara pa nun tener que colar pa casa y dalo por finiquitao. En esta ocurrióseme dir a encerranos cola peña del astilleru. Julio que qué mas quería que armala, apuntose darréu. Pa facer el camín mas llevaderu mercamos unos botes de birra que Beto tuvo a bien apurrínoslos nuna bolsa plástica que díba facilitanos el tansporte abondo. Pa'lla arrancamos Julio, yo y la bolsa col maxín encendíu polo guay que diba ser la movida. Paramos en los arcos de la cai Marqués de San Esteban, porque dempués de mas de cincuentra metros caleyaos, dionos la sede y nun hubo manera siguir ensin mete-y un tientu a la bolsa plástica y pimplase un par de botes. Mariano Pola siguía ellí alantrones y nun yera plan de facer la mítica arrancada de caballo andaluz y frenazu de burru manchegu. Aforrando fuerces polo que pudiera pasar, siguimos camín del astilleru. En llegando a la frontera col Natahoyo pudimos ver les mancaúres nel asfaltu. Berrugues d'alquitrán que los neumáticos quemando dexaben como güelles imborrables pa nun escaecer que yera lo que pasaba. Fogueres sindicales testigues de osties, toletazos, bolazos y, delles veces, tornillazos. Según dibes pasando esi campu de batalla, de vixilia de momentu, enchipábeste mas y naguabes por atopate con un putu maderu al que tira-y daqué. El muru esterior del astilleru yera un esbarrumbe y diba tiempu nun servía. Pasámoslu fácile y llegamos a la muria verdadera. Saltámosla. Dientro taba too tranquilo y nun atopamos a naide col que solidarizase. Nun se por qué, atalantamos que igual el encierru yera nuna de les cabines de les grúes, cola cosa de que ellí encerraos, a ver quien yera el maderu que esguilaba a sacalos. Ya se qu'esto en frío paez imposible pero, qué quies que te diga. Atacaos de puxu solidariu entamamos a esguilar pela escalerilla de la grúa. Na muñeca llevaba la bolsa, el pitu na boca y el raciociniu quedó n'ayuri. Llegamos a la cabina y ellí nun taba naide. Eso si. Víase too Xixón. Como el sitiu yera afayadizu metímonos otru par de cerveces pa mentantu camentábamos qué facer. Nesto dímonos cuenta lo muncho que subía la pluma de la grúa. Dende la cabina yera otru tanto a lo que habíamos esguilao. Julio y yo, collacios dende guajucos, con toes les picies feches y fartos de facer burraes, mirámonos. Taba de caxón que tiníamos que llegar a lo cimero. Y con les dos birres que quedaben na bolsa, atacamos el tramu final, llegando al picu de fierru tan pichis. Ellí nos sentamos, abrimos les lates y entamamos a glayar lo clásico nestos casos. Que si quemamos Xixón, que si astilleros solución, etc. Ente rises y rutios paeciome ver lluces en baxo. Como llinternes que se movíen y nos apuntaben. Mandé callar a Julio, que taba entregáu a soflames varies, y sentí xente ellí que nos dicía que baxáramos. Como siempre fuimos paisanos formales, baxamos. Taben esperándonos un exércitu de guardies de seguridá. Mirábennos serios de coyones, El más altu entrugonos: -Pero que facéis na grúa? Cola seguridá que tien un d'años d'armala, dixe: -Vinimos a encerranos colos compañeros del astilleru! Alcuérdome de la cara del sucedáneu de maderu aquel, mironos y dixo:-Esto ye Juliana y el encierru ye en Naval Gijón. Abluqué. -Calla ho! Vaya fallu! Julio camudó en encarnao. - Pero, por dónde entrasteis? El guripa entrugaba mientres yo esperaba que un Boeing 727 en vuelu rasante me llavara pa siempre. -Coño, pol muru. Dixe. Xuru. Julio mirábame raro. -Meca, pues tengo que dar parte. Vamos dir al sitiu onde entrásteis que tengo que velo. De la que díbamos caminando, Julio siguía mirándome enfotáu. Llueu contome que yera pa tar atentu cuando yo echara a correr. Casi llegando, apunté al muru vieyu y dixe: -Per ellí. -Per ellí ónde? -Onde'l esbarrumbe. -Ah coño, y llueu? -Na ho! Llueu saltámoslo. -Joder menos mal que susto. Vale, Vale, Anda, salir por aquí. El segurata quedó encantáu de nun tener que facer un informe por un fallu de seguridá y por poco nos da les gracies. Julio y yo caminamos selemente hasta perder de vista el astilleru. Paramos acabando Mariano Pola y entamamos a reínos como si nun hubiera mañana. Casi trenta años dempués sigue sin danos vergoña. SI NO HAY SOLUCIÓN, QUEMAMOS XIXÓN!

2 comentarios: